പയ്യന്നൂർ: വനിതാ സിവിൽ പൊലീസ് ഓഫിസറെ വെട്ടിക്കൊന്ന ശേഷം ഒളിവിൽ പോയ ഭർത്താവ് പിടിയിൽ. ചന്തേര പൊലീസ് സ്റ്റേഷനിലെ സി.പി.ഒ ദിവ്യശ്രീയെ പെട്രോളൊഴിച്ച് തീക്കൊളുത്തിയ ശേഷം വെട്ടിക്കൊന്ന ഭർത്താവ് രാജേഷാണ് പിടിയിലായത്.
കണ്ണൂർ പുതിയതെരുവിൽ വെച്ച് വളപട്ടണം പൊലീസാണ് പ്രതിയെ കസ്റ്റഡിയിലെടുത്തത്.ഏതാനും നാളുകളായി രാജേഷും ദിവ്യശ്രീയും അകൽച്ചയിലായിരുന്നു. ഇവർക്ക് ഏഴു വയസുള്ള മകനുണ്ട്. ഇന്നലെ വൈകീട്ട് 5.45ന് കരിവള്ളൂർ പലിയേരിയിലെ വീട്ടിലെത്തിയാണ് രാജേഷ് കൊലപാതകം നടത്തിയത്.
മൃതദേഹം പരിയാരത്തെ കണ്ണൂർ ഗവ. മെഡിക്കൽ കോളജ് മോർച്ചറിയിലേക്ക് മാറ്റി. ദിവ്യശ്രീയെ രക്ഷിക്കാൻ ശ്രമിക്കുന്നതിനിടെ പരിക്കേറ്റ പിതാവ് വാസുവിനെ കണ്ണൂർ ബി.എം.എച്ച് ആശുപത്രിയിൽ പ്രവേശിപ്പിച്ചു. ഇദ്ദേഹത്തിന്റെ നിലയും അതീവ ഗുരുതരമാണെന്നാണ് വിവരം.
